أول تعليق من والدة الشاب المتوفي بصالة الجيم بعد إحالة أوراق المتهم للمفتي: ابني تنبأ بموته.. "فيديو"

قضت محكمة جنايات كفرالشيخ، اليوم الإثنين، بتحويل أوراق المتهم بقتل شاب داخل إحدى صالات الألعاب الرياضية، لفضيلة المفتي لإبداء الرأي الشرعي قبل النطق بحكم الإعدام.

حيث شهدت إحدى صالات الألعاب الرياضية بمحافظة كفر الشيخ جريمة قتل بشعة، حيث قام المتهم " الكفراوي" بقتل المجني عليه "أحمد" بأحد أدوات رفع الأثقال "الدامبل"، وتزن 5 كيلوجرامات على رأسه ثلاثة مرات متكررة، مما تسبب في إصابته بنزيف داخلي، وتم نقل المجني عليه لأحد مستشفيات كفرالشيخ، وقام الأطباء بتحويله لغرفة العمليات لمحاولة إنقاذه، ولكن إرادة الله كانت أقوى، وتوفى المجني عليه متأثرًا بإصابته.

وروت والدة المجني عليه لكاميرا "مصر تايمز" خلال البث المباشر تفاصيل الواقعة وفقًا لما أخبرها به شهود العيان قائلة: " إبني كان على خلق ورياضي كان دايما بيروح الجيم، وقبل ما يموت بـ 4 شهور في واحد جيه الجيم وهو سوابق وليه بدل القضية اتنين إسمه (الكفراوي)، وكان بيتنمر عليه ولما كان أحمد مابيروحش الجيم كان بيقول الواد المتوحد فين؟ عشان أحمد قليل الكلام، ولما كان بيشوفه راكب عربيته، كان يقول أمه جايباله العربية، وكل ما أحمد يتدرب على جهاز كان بيقوله أنا عايز اتمرن على الجهاز ده، ولأن أحمد على خلق، كان بيسيبها، واللي حصل يوم الحادثة قطع قلبي، زمايله في الجيم حكولي كل اللي حصل".

وعن حالتها عند سماعها بإصابته قالت: "أنا ماكنتش مصدقة، ماكنتش متخيلة إن إبني اللي قبل ما سابني سلم عليا وشاورلي، اتضرب وبيضيع مني"، أما عن شعوره بوفاته قالت الأم: " قبل الحادثة بيوم كنت بعمله الفطار، لقيته بيقولي ياماما انتي جايلك إمتحان بس المرة دي صعب، لإن أنا كنت عاملة حادثة وعمليتين، قولتله لا يا أحمد أنا مش عايزة امتحانات تاني، أنا هسوي معاشي وهقعد في البيت، وتاني يوم اللي هو يوم الحادثة في نفس المعاد اللي كان بيتكلم معايا فيه إمبارح، لقيته بيصورني على تليفونه وقالي ياماما أنا عايز الفردوس الأعلى، قولتله يا أحمد إن شاء الله هنكون رفقاء وأنا هكون السابقة وانت اللاحق بيا".

وأكدت والدة المجني عليه على ثقتها بالقضاء المصري: " المحامين بتوع الكفراوي قالوا إنه هياخد 7 سنين، بس كلام المحامين ماكانش بيهزني من ثقتي في ربنا وفي قضاءنا، أنا كان عندي ثقة في ربنا وفي قضاء مصر العادل إن حق أحمد هيجيله وشرع الله هيتطبق، شكرًا للقضاء العادل الذي لا يخاف إلا الله، وبشكر كمان كل اللي وقفوا معايا من الشرطة والنيابة ومحامين أحمد، محدش فيهم سابني كانوا حاسين بالمصيبة اللي أنا فيها إن إبني إتاخد غدر من واحد لا يخاف الله".