أصيبت بدم ملوث أثناء الولادة.. أسرة "حبيبة" ضحية الإهمال الطبي بالقليوبية تروي تفاصيل الواقعة (فيديو)

تعرضت حبيبة محمود "19 عامًا" لنزيف حاد بعدما دخلت لتجري عملية ولادة داخل عيادة خاصة، تديرها طبيبة بمدينة القناطر الخيرية، بمحافظة القليوبية، منذ 27 يومًا، مما عرض حياتها للخطر وأصيبت بعدها بمشاكل صحية منها مياه على الرئة، وتوقف الكلى، وتم نقلها لمستشفى الدمرداش لترقد حاليًا بوحدة العناية المركزة. 

وروت والدة زوج "حبيبة" تفاصيل الواقعة لكاميرا "مصر تايمز" خلال البث المباشر: " حبيبة كانت متابعة من أول الحمل مع الدكتورة اللي ولدتها، ولما حددتلها معاد الولادة طلبت منها آشعة وتحاليل، واكتشفت انها عندها أنيميا وادتها محاليل فيها حديد وفيتامينات، وبعد ما ولدت الدكتورة قالتلنا انها كويسة واخدناها وروحنا البيت".

وتابعت: " بعدها بساعتين قالتلي بطني بتوجعني وقعدت تصوت، فاتصلت بسكرتيرة الدكتورة وشرحتلها إن حبيبة برازها أسود وهي ماكلتش حاجة لسة، فقالتلي انا هوصلك بالدكتورة تقوليلها، فالدكتورة قالتلي روحي الصيدلية اللي جمبي وإدي التليفون للصيدلي، والدكتورة قالتله إديها حقن مسكنة، أخدت الحقنة وبعد شوية مفعولها راح والبنت لسة تعبانة، فكلمت سكرتيرة الدكتورة فقالتلي نفس الكلام اللي قالتهولي أول مرة فروحت للصيدلي تاني وكلمتها لما روحتله واداني مسكنات تاني، والبنت اخدتها وفضلت تعبانة، واستمرينا على كدة لاكتر من 6 ساعات، وكل ده وأنا بكلم السكرتيرة و هي بتتصل بالدكتورة، لكن ماتكلمناش مع الدكتورة مباشر أبدًا".

وقالت أن الطبيبة طلبت منهم إحضار "حبيبة" إليها في الصباح الباكر لمتابعتها: " لما كلمنا الدكتورة آخر مرة الساعة 12 بالليل قالتلنا هاتوهالي الساعة 8 الصبح المركز، وقعدت تديها محاليل فيها 4 و 5 أدوية مرة واحدة، وبعد شوية لقيت البنت وشها بقى أصفر، فقولت للدكتورة قالتلي ماتقلقيش حبيبة مفيهاش حاجة ده مجرد التهاب في الأمعاء، ويوم السبوع أغما عليها فجأة، وبعدها دخلت العناية المركزة واكتشفنا انها جالها مية على الرئة وتوقف للكلى".