بـ"لافتة" وملابس سوداء.. أهالي جرجا ينعون شهيد الشهامة: رمى نفسه في النار عشانا (فيديو)
علق أهالي شارع الشيخ مرزوق "لافتة" كبيرة مُعلقة لشهيد الشهامة محمد الغريب؛ والتي قام بعملها أهالي المنطقة في مركز جرجا بمحافظة سوهاج تقديرًا له واحترامًا لدوره في إخماد نيران لو امتدت كانت دمرت بيوتهم كلها، وبين الملابس السوداء القاتمة والدموع التي لم تجف بعد؛ ملابس بيضاء ووجوه مبتسمة مستبشرة تزف "الغريب" وكأنه عريس لا شهيد.
ويقول "أحمد الغريب" شقيقه: "روحت غسلته وكفنته كان ما شاء الله عليه بدر منور لابس ابيض كأنه ملاك، دا رايح شايف الجنة قدامه راضي وضاحك هيقابل وجه كريم، أنا بقيت فرحان من ضحكته وبياضه وشه كان مبتسم وكأنه عارف هو رايح فين".
ويقول أحد جيرانه: "يوسف دا ابننا كلنا ميخافش عليه، من النهاردة هو ملزم من الكل ابوه مماتش كلنا محمد الغريب كلنا ابوه ولو عاوز عيونا متغلاش عليه، محمد طول عمره صاحب خير وأعماله تشهد له بكده، طول السنة يعمل جمعيات ويجي في رمضان يطبخ في بيته ويفطر الناس في المسجد برغم ان ظروفه المعيشية صعبة بس كان يعمل لوجه الله وزاهد في الدنيا".
مستشفى سوهاج العام قتلت "الغريب"
"مستشفى سوهاج العام قتلت محمد الغريب"..هذا ما ردده "أحمد الغريب" شقيق الضحية، بعدما ذهب إلى المستشفى بعد سقوطه في النار وطلب يد العون منهم، فقال له النبطشي "استني الدكتور لما يجي الصبح"، وقال "روحنا المستشفى المراوح مش شغالة والتكييف مش شغال، الخدمة الوحيدة وضعوا مرهم عليه محدش كشف ولا قدم له أي مسكن، روحت للجيران أخدت منهم مروحة تبرد ناره وقعدت اهوي له بالكرتونة، كان هيموت من التعب، مستشفى سوهاج العام قتلت اخويا".
