اتهجم عليا.. فتاة تحذر من سائقي شركة دي دي DiDi
حذرت فتاة من سائقي شركة دي دي DiDi بعد تعرضها للهجوم من أحد السائقين لرفضها دفع مبالغ زيادة.
وقالت عن شركة شركة دي دي DiDi،" امبارح السواق اختلف معايا على ثمن الرحلة (قال ثمن من دماغه) ولما مارضيتش ادفعه طلع يجري بالعربية واقوله وقف العربية وقف العربية ولما وقفها نزلت اجري من العربية وهو نزل يجري ورايا، ولما زعقت بصوت عالي الناس اتلمت عليا وهما اللي انقذوني منه.
وتابعت،" تفاصيل الرحلة: ركبت مع سواق كان مشوار قريب داخل المعادي، لما طلبت الرحلة طلع لي التكلفة وكان في بروموكود.
لما قربنا نوصل للمكان قلت للسواق ما تدخلش من الشارع ده ادخل من الشارع التاني ورحنا نفس المكان بس عن طريق مسار مختلف، لما وصلنا ونهى الرحلة لقيته بيقولي عايز مبلغ (ضعف ثمن الرحلة العادي) قلت له ايه المبلغ اللي انت بتقوله ده، انا طالع لي اني ادفع مبلغ كذا، قالي انتي غيرتي الطريق اللي كنا هانمشي منه وده ابعد وانا الشركة مش بتحسبلي الزيادة (مع ان هو هو نفس المكان اللي هانوصله وتحركاتنا كانت في نفس المربع) قلت له خلاص هادفع لك 15 جنية زيادة فوق المبلغ بتاع الرحلة.
وقالت الفتاة ،" قالي لأ وفضل مصمم على المبلغ اللي قاله من دماغه اللي هو ضعف ثمن الرحلة العادي، وقلت له لأ مش هادفع، فطلع يجري بالعربية بسرعة رهيبة ومش عارفة هو بيعمل ايه ولا رايح فين وانا قعدت اصرخ بصوت عالي ولما نزلت من العربية في ناس اتلمت والحمدلله بعدوه عني، وفي الآخر آخد مبلغ الرحلة وعليه 17 جنية زيادة علشان بمشي وكان قاعد يقل أدبه وحاولت اتصل بخدمة عملاء DiDi لكن مفيش ليهم رقم أساسا".
