إيناس الدغيدي تثير الجدل من جديد بسبب فلسطين ولبنان.. ماذا قالت ؟
أثارت المخرجة إيناس الدغيدي حالة من الجدل خلال الساعات الماضية وذلك بسبب تعليقها على تنظيم المهرجانات والفعاليات الفنية تزامنا مع الأحداث الطارئة التي تمر بها فلسطين ولبنان .
وقالت إيناس الدغيدي أثناء تواجدها بفعاليات مهرجان الجونة السينمائي في دورته السابعة : "لا يصح منع الفعاليات والمهرجانات الفنية لأن الفنان يحرص على تقديم المتعة للجمهور، والأعمال الفنية والمهرجانات تخلق نوع من عدم الإحباط وتخرج الناس من الحالة السلبية" .
وأضافت : " مش ممكن يحصل لمصر لقدر الله مشكلة زي البلاد التانية، بس ده ميمنعش اننا نوقف احتفالات احنا بشر ومش على طول في نكد، لما تلاقي حد طول النهار بيعيط ومكتئب بتبعدي عنه، المهرجانات الفنية بالقيمة بتاعتها لو لغينا سنة أو اتنين ولكن لو الموضوع هيطول حرام نحرم الناس من المتعة، والناس هتفضل تحكم علينا".
وصرحت أيضا حول منع عرض فيلم آخر المعجزات بافتتاح المهرجان قائلة : "أن من حق الرقابة أن تتدخل في القوانين ولكن بوجود المفاوضات من الممكن التوصل إلى نتائج للعرض أو المنع" .
وأوضحت : "أنها لم تشاهد الفيلم الذي تسبب في حالة من الجدل خلال الأيام الماضية، ولكن الرقابة لديها مشاكل في البداية مع كل الأفلام ولكن هناك بعض المناقشات والمفاوضات التي تصل إلى نتائج مرضية في النهاية" .
وفي وقت سابق، تصدرت إيناس الدغيدي محرك البحث "جوجل" وذلك بعد تصريحاتها الأخيرة والتي أصبحت الأعلى جدلا عبر وسائل التواصل الاجتماعي.
قالت المخرجة إيناس الدغيدي خلال تصريحات إعلامية، أنها لم تفكر في الحرام طيلة حياتها موضحة: مفكرتش في الحرام كتير، ومش حطاه التارجت بتاع حياتي، لأني لو فكرت وقلت حرام حرام، مكنتش عملت أي حاجة في حياتي.
وأضافت إيناس الدغيدي: الناس شايفني عملت الحرام أكبر بكتير من اللي أنا عملته لأن أفكاري وجرأتي أدت انطباع غير شخصيتي الطبيعية خالص، لكن أنا مش بشرب خمرة ولا سجاير وعلاقاتي مظبوطة ومناسبني سنًا وعقلًا ومش بعمل علاقة من تحت الترابيزة، وممكن أدخل علاقة الناس تشوفها حرام لكن أنا بشوفها عادية طالما فيها صدق وحب واهتمام، وما بحاسبش روحي بالحلال والحرام، وأفكاري الجريئة ظلمتني زمان وقدرتني النهارده لأن اللي بيتعمل أكتر بكتير من اللي قلته.
وفي تصريح جريء كشفت إيناس الدغيدي أنها لم تتزوج عرفيًا على الإطلاق ولكنها عاشت المساكنة قبل زواجها من زوجها، قائلة: عمري ما اتجوزت عرفي، لكني عشت المساكنة مع جوزي قبل ما أتجوزه أكيد، لأني قعدت تسع سنين بحبه، ومش فاكرة المساكنة كانت كام سنة بالظبط.
وأكدت إيناس الدغيدي أنها متصالحة مع عمرها، مشيرة إلى أنها تبلغ من العمر 70 عامًا، مردفة: سعيدة جدًا، وسن السبعين سن جميل، ومش حاسة باختلاف ولا حاسة إني كبرت ولا تعبت، ولسه مش بشوف خط النهاية اللي هو الموت، ودايمًا عندي حتة خيالية لكل شيء وشايفة الموت حياة فيها جمال ومش خايفة منه، لأن هو أكثر هدوء وسلامًا وروحانية وحاجة مش عارفاها وأنا بحب أكتشف كل حاجة في الحياة، ويمكن أنا الوحيدة اللي هتموت وترجع تقول حصل إيه.
وبسؤالها عن إذا كانت تعيش قصة حب الفترة الحالية قالت: مقدرش أعيش من غير حب، وممكن أحب شخص شايفاه أنه يصلح أني أحبه وهو مش مديني كل المعطيات بتاعة الحب، ويا رب ميدينيش علشان أفضل أحبه، يعني موجود لكن مفيش تعاطي بينا وبين بعض.
