صديق عمر القاضى لـ"مصر تايمز": مكانش بيخاف من حاجة وعاش ومات راجل

وأضاف صديق عمر فى تصريحات خاصة لـ"مصر تايمز": "عمر من أرجل الناس اللي الواحد اتعامل معاها.. طول عمره جدع وراجل ومن الناس النضيفة اللي اتعاملت معاها فى حياتى.. هو كان كويس ومتربي ومكانش بيخاف من أي حاجة.. نال الشهادة ومش أي حد ينولها".

وتابع صديق الشهيد: "صدمة خبر استشهاده مكناش مصدقين لما سمعناها.. مكانش سهل علينا نسمع خبر زي ده.. إحنا شايلين هم لما نشوف حلقة استشهاده على التلفزيون وخايفين نتفرج عليها كأننا خايفين من يوم الحساب.. خايفين نشوف اللي سمعناه.. احنا هنتفرج غير أي حد.. كل ما بنسمع التسجيل كأنه أول مرة".

وأورد: "عمر عاش جدع ومات جدع، وفخر لينا كلنا إنه بالثبات والشجاعة دي كلها فى موقف زي ده محدش هيقدر يواجهة مش أي حد ممكن يتعامل مع الموقف كدة.. أنا مش عارف هو جايب الثبات ده كله منين.. ثباته يتدرس".

وظهر الشهيد عمر القاضي فى الحلقة الـ 28 من مسلسل الاختيار ، لحظة استشهاده بعد تعرضه وزملائه لهجوم مسلح على الارتكاز الأمني "بطل 14"، في الساعات الأولى من صباح أول أيام عيد الفطر المبارك عام 2019، تزامنًا مع تكبيرات العيد.

وبعد استشهاد البطل انتشر تسجيل صوتي له مع قوات دعم الارتكاز الأمني، يوثق آخر كلماته التي رددها قبل استشهاده؛ ليضرب أروع أمثلة التضحية والفداء، وبات أيقونة للشباب.

وقال القاضي فى المقطع الصوتي: "غربل السبيل علينا.. دك الكمين.. أنا بيتضرب عليا آر بي چي.. معايا شهيد وكلنا فى السكة يا جدعان".. ويختتم بـ"قولوا لأمي ابنك مات راجل.. تعالالي ياض لو تعرف".