آثار الحكيم عن سمير غانم: هو اللي قال لازم تمثلي

دعت الفنانة المعتزلة آثار الحكيم بالرحمة للفنان سمير غانم، قائلة "الله يرحمه قطع بينا. استغفرك ربي وأتوب إليك، محدش حيغلى على رب العالمين وخالقنا جميعا."

وقالت فى مداخلة مع برنامج "الستات مايعرفوش يكدبوا" على قناة CBC، : "كنت في أولى جامعة باشتغل كل أجازة صيف، وكنت من النوع ماخدش مصروف من والدي الله يرحمه ولازم أعتمد على الله ثم على نفسي. فكنت باعمل في فندق وسمير سألني بتعملي إيه هنا وبتدرسي فين..الله يرحمه قالي لازم تمثلي، وأنا بصراحة مكانش في بالي أبدا ولا عمري حلمت بيها ولا تمنيت أبقى ممثلة. كنت مخططة إني حاكمل دراسة ليسانس لغة إنجليزية والأدب الإنجليزي، وفعلا كنت مقدمة على ماجستير في الجامعة الأمريكية على أساس حاكمل وأعمل دكتوراه."

وتابعت: "هو الحقيقة قدمني للمنتج الكبير الله يرحمه رياض العريان، وبخبرته أستاذ رياض اكتشفنا كوجوه جديدة أنا وسمية الألفي الله يشفيها ويعافيها وعفاف شعيب. وبخبرته برضه أول حاجة إدهاني وأنا عمري ما مثلت ولا وقفت قدام كاميرا كانت بطولة."