"فتاة الترينج" ضحية التنمر بجامعة الأزهر لـ"مصر تايمز": "دى مش أول مرة يتنمروا عليا وعلى لبسى"
الثلاثاء 29/يونيو/2021 - 07:34 م
كشفت الفتاة التى تدعى "نهال سليم"، والشهيرة بين زملائها بـ"تيكا"، حقيقة ماتم نشره على موقع التواصل الإجتماعى "فيس بوك" والذى يتضمن واقعة تعرضها للتنمر من إحدى المراقبين عليها باللجنة أثناء دخولها لتأديه امتحانها السادس بجامعة الأزهر فى العاشر من رمضان.
وقالت نهال فى تصريحات خاصة لـ "مصر تايمز": "دى مش أول مرة اتعرض للتنمر منهم..أنا مش بروح الجامعة خالص غير على الامتحانات بتاعتى لانى انتساب..وكل مرة كنت بعمل نفسى مش واخدة بالى بس المرة دى كانت فظيعة أوى".
وتحدثت "نهال" بشكل واضح عن ما كانت ترتديه من ملابس فضفاضة وليس مثيرة حتى يتم الهجوم عليها بهذا الشكل وأنها ممن يفضلوا ارتداء الملابس الرياضية.
وقالت الفتاة "نهال": " كنت بمتحن الماده السادسة من إسبوعين كده وكنت رايحه الجامعه بلبس سبورت اوفر سايز اتهزقت شويه على البوابه بس معرفش ليه المهم اخدت كلمتين واشطا وسكت.. ودخلت لجنتي وكان عندي معيده لابسه نقاب وأول ما دخلت وشافتنى قالتلى قومى ارجعى ورا مش طايقه اشوفك قدامي كل دا وانا لابسه الكمامه ويعتبر نايمه ع نفسي لحد ما الورق يتسلم راحت مزعقه فيا قولتلها نعم بتكلميني انا قالتلي انتي مشوفتيش منظرك قعدت امسح ف وشي شكيت ف نفسي قولت ممكن اكون حطيت ميكاب وانا بغسل وشي وبنزل اساسآ المهم قولتلها انا عملت ايه غلط قالتلي انتي بتبجحي قولتلها ما انا عايزه اعرف انا عملت ايه قالتلى " شكلك بيسيئ بسمعة الأزهر" انا اخدت الكلمه واتجننت سبتلها اللجنه وخرجت".
وتابعت نهال: "طلعت لصحبتى بحجة اجيب منها قلم لأني لو كنت فضلت مكنتش هتحكم فى أعصابي واول ما نزلت قالتلي خليكي برا فضلت حوالي 10 دقايق كل دا من الوقت اخدتني الكنترول وكلمت دكاتره تانيه كبار وكل دول عليا حوالي ساعة وهاتك يا سلخ وانا اتجننت ومبقولش غير انا عملت ايه مش فاهمه فين لبسي الوحش دا المهم عدي نص الوقت والناس بتخرج خلاص وانا كنت لسه داخله لجنتي كأنهم اتعمدو انهم يطولو ف الكلام علشان يعاقبوني دخلت اللجنه انهارت لحد ما كان خلاص فاضل نص ساعه واللجنه تخلص جتلي تاني المعيده دي وانا كنت منهاره وفتشتني تفتيش ف منتهي الخرا وانا خلاص خارجه وبمضي راحت حاطه رجليها ع الديسك اللي بنمضي عليه علشان انا اوطي وامضي عند رجليها كل دا مش المشكله ابدآ ".
وقالت "نهال" أنها لن تترك حقها مهما تكلف الأمر معها أو عاد عليها بسوء قائلة : "كل شويه حد يقولى هتترفدي رفد برفد بقى أنا مش هسيب حقي ومافيش قانون فى الأزهر بيمنع دخول الجامعة ببنطلون ايآ كان نوعه" .
